Consellos para evitar consumos fóra da túa tarifa

Nas facturas de R aparecen desagregados todos os conceptos dos servizos facturados, para que poidas coñecer o seu custo exacto. Ten en conta que as tarifas de fixo ou móbil poden ter incluídos algúns tipos de consumos, pero non todos. Aquí ofrecémosche algúns consellos para evitares sorpresas na túa factura.

Cando se inicia a comunicación a un número de tarificación adicional, R infórmache de que a chamada que vas facer se atopa fóra da túa tarifa. 

Despois disto, ofrécese unha locución de 20 segundos antes de que se inicie o servizo de tarificación adicional. Se cortas a chamada antes de que remate a locución, unicamente se facturará o custo da comunicación, non o servizo de tarificación adicional, xa que non se accedeu a el.

O tempo de duración destas chamadas de tarificación adicional está limitado por lei para evitar facturacións excesivas. Na factura verás o nome da empresa propietaria do servizo.

Para evitar este custo de chamadas recomendámosche que as bloquees dende a Área de cliente R

Os SMS non están incluídos nas tarifas R de móbil. Existen diferentes tipos, e o seu custo depende do destino. 

Cando é a outros móbiles, o custo é por mensaxe enviada. Adoita ser reducido, pero a día de hoxe existen outras aplicacións de mensaxaría de texto gratuítas para as que unicamente se precisa unha conexión de datos ou wifi e non teñen custo por mensaxe enviada. 

Outro tipo son os SMS Premium, que poden ter ademais unha tarificación adicional ao custo do envío. Adoitan utilizarse para concursos, descargas de contido ou recadación de fondos en proxectos solidarios. Neste caso, as empresas deben informar na súa publicidade do prezo máximo por mensaxe, a identidade do operador, o número de atención ao cliente e o servizo que ofrecen. Antes de facer un envío a un número curto, recomendámosche que comprobes toda esta información.

Existen tamén SMS que se utilizan na configuración de aplicacións. Envíanse de xeito automático durante o proceso de configuración ou actualización e algúns deles son SMS do tipo internacional. Iso acontece, por exemplo, con aplicacións propias de Apple, como Facetime ou iMessage. Podes ver na túa factura SMS internacionais con destino ao Reino Unido. Porén, non atoparás o SMS enviado no historial de envíos do teu teléfono. 

Durante o proceso de instalación adoita aparecer unha mensaxe de advertencia ao usuario para o informar de que a instalación precisa do envío de SMS e poden ter un custo asociado.

Na túa tarifa R de móbil ou fixo non están incluídas as chamadas internacionais, pero dispomos dunha serie de plans e bonos que che permitirán facer estas chamadas de xeito máis económico. Podes consultalos nas Tarifas oficiais

O roaming é o servizo que permite facer uso da túa tarifa móbil no estranxeiro. Existen diferentes zonas xeográficas en función de acordos internacionais de itinerancia. Se viaxas a países da UE non terás custo adicional por chamares ou navegares, pero ollo! Hai países, como Andorra, Macedonia, Mónaco, Montenegro, San Marino ou Suíza, que malia estaren en Europa non dispoñen de acordos e, xa que logo, as súas chamadas e tráfico de datos teñen custo. Consulta no noso buscador de países os países con roaming e o seu custo.

Consulta tamén a nosa Política de uso razoable de roaming para evitares custos non desexados se viaxas durante longos períodos ao estranxeiro.

No caso de que queiras bloquear algúns destes servizos, non dubides en chamar ao noso teléfono gratuíto de Atención ao Cliente e axudámosche.